吴语区全图
吴语是一门历史悠久的语言，通行于上海、浙江、江苏南部、皖南+赣东北边界。其中上海、浙江北部大部分、江苏南部大部分，同属吴语最大的一个分片：吴语太湖片。（图上所有泛蓝色地区）。包括了苏州话、上海话、宁波话、常州话、绍兴话、无锡话等一系列子方言。
吴语公众号已经开通了评论和赞赏功能。如果您有想说的，可以在本文最下方发表或者查看评论！
如果您喜欢这段故事，可以点本页最下方的"赞赏"来赞赏本文原作者并且点右上角分享本文到朋友圈
往期吴语有声故事回顾：
点击即可查阅：【吴语有声故事】徐志摩曾经用吴语写过作品!?
点击即可查阅：【吴语故事会】家乡故事《上海回忆·乘风凉》
点击即可查阅：【吴语故事会】乾隆和诋毁和尚 (吴语杭州话)
请注意：以下全文系吴语白话文，全文使用吴语正字书写。吴语白话文倡导我手写我口。希望各位可以借此认识到吴语之正确书写方法。勿再以普通话之谐音来书写吴语。全文朗读口音为吴语上海话。
文：钟螺
朗读：霹雳小黑
本文和本音频由作者和朗读者授权在微信发布。如需转载，请联系原作者。
文字与原文有略微改动。
欢迎评论！滑动至最下方可看见评论选项
点击开始播放，下方附有全文
余彩琴早上向买好菜回转来，爬六层楼嗰楼梯，爬得伊只脚馒头是苦透苦透，到了屋里向门口头只剩下来半条命快了。
伊搭平常辰光一样，立嘞楼梯口先拿当初修箇栋公房嗰人骂得来臭要死，再拿钥匙开门。
台子高头多出来一面镜子。
就是箇种推车子摊头高头卖嗰，微微小，搭手掌心差弗多大嗰，跟绒线针一道买好畀侬便宜眼嗰箇种小镜子。
余彩琴想：喔唷，只老头啥辰光会得买箇种物事啦，阿是要花嚓嚓，送畀跳交谊舞嗰伊拉嗰搭子啊。
伊就拿起镜子来看一看，箇镜子嘞陌生头一亮，上头出来一个小人，搭手指拇头差弗多大，开口就讲：“您好，我是被封在镜子中的魔灵，感谢您解放了我，我可以为您满足三个愿望，您有什么想要的吗？”
余彩琴听弗大懂伊嘞讲啥，就问伊：“唉，箇侬好讲上海闲话伐？”
小人点点头讲：“好嗰，箇是第一只愿望，箇末阿姨侬嗰第二只愿望是啥呢？”
余彩琴讲：“啊，箇就第一只没啦，侬箇虚假广告嘛，侬侬侬侬领导啥人啊，我要投诉侬噢，现在消保委老结棍嗰侬晓得伐，顶少，顶起码噢让侬扣一个号头工资。侬晓得伐侬？”
小人畀机关枪轰得来要哭出来快了，就讲：“阿姨侬弗要投诉我，我，我也是第一趟做箇嗰生活，要末刚刚只弗算了好伐？帮侬还是算三只。”
余彩琴满意了，讲：“箇还差弗多。箇末侬既然好满足我愿望，我就先试试看，我要箇老公房装新电梯好了。”
小人讲：“箇算啥事体啦，马上帮侬办好。”
余彩琴就觉着楼抖了抖，小人讲：“阿姨，已经好了呶，侬出门看看比较。”
余彩琴拿镜子摆嘞袋袋里，出门去看。果然呶，一部新电梯，拆刮蜡新，走进去亮堂堂，揿一记，到一楼飞快，余彩琴满意了。
小人嘞拉袋袋里讲：“阿姨侬满意了伐？第二只愿望是啥？”
余彩琴拿出镜子来，讲：“啊？箇就算第一只啦？箇是试吃侬晓得伐？阿拉买葡萄买荔枝买橘子全好拿一只吃吃看嗰，弗甜弗要钞票嗰，算送嗰，侬晓得伐侬？侬箇嘛，也应该算试吃嗰呀。”
小人真嗰要哭了，讲：“阿姨侬弗好箇能嗰，我一塌括子也就三只嗰本事，侬刚刚试一试，拿我三分之一全去脱了，畀侬试吃，箇末我要畀阿拉领导骂山门嗰呀。”
余彩琴看到小人哭了末，喔唷，也有眼心软了。想想看有部电梯也是蛮便当嗰，阿拉老头子风湿关节炎咾啥，上楼梯便当交关唻，就讲：“好好好好好，弗要觉着阿姨欺负侬了。阿姨弗欺负侬了噢，第一只就第一只。”
小人又笑了，嘞镜子高上头转了一圈，讲：“谢谢阿姨！”
余彩琴又讲：“喔唷，侬个小人嘴巴还蛮甜嗰。箇末第二只愿望我想想看噢。我要阿拉只戆大儿子寻着份工作，箇月薪总归要五六千块朝上伐，顶好是国企，公务员末更加好，离屋里向末近一眼，弗要忒吃力，加薪加得多，弗要加班。”
小人面孔全皱起来了：“阿姨，箇世界高头要有箇种工作我也要去了，啥人蹲嘞箇搭啊？”
余彩琴面孔板起来了讲：“侬哪能箇点本事也没，吹牛皮嗰本事倒蛮大嗰。”
小人只好想了半天讲：“嗯……阿姨要末弗是国企可以伐，现在国企改制唻，效益全推扳来死嗰，弗要讲加薪了，弗减薪也蛮好了。”
余彩琴觉着，嗯：“箇也有些道理，箇末侬讲讲看，到底是啥啥工作呢？”
小人讲：“要末当个市长，虽然讲没加薪，但是起薪就一万多块唻，也可以了是伐侬讲？”
余彩琴喇一记头搨，小人哎哟哇一记，隑嘞镜子高头就弗起来了：“阿姨侬做啥？”
余彩琴讲：“我嗰戆大儿子好当市长啊？没几天就畀人家撸脱了，工资也弗一定拿得着。再讲侬要拿杨雄撸脱介便当啊？”
小人就讲：“可以让伊升级嘛，，市长只位子正好空出来。”
余彩琴讲：“后头交关副市长，挨得着我儿子啊？侬弗要瞎讲八讲，寻只普通工作就可以了。”
小人讲：“哦哦我想着了！我想着了，箇只顶灵嗰，阿姨侬儿子也一定欢喜嗰！”
余彩琴讲：“啥工作？”
小人就讲：“喔唷，是只书店嗰营业员，箇书店嗰效益蛮好嗰，外加嘞该市中心，顶顶重要嗰是，㑚儿子一定欢喜嗰。”
余彩琴想书店营业员虽然立柜台还有眼吃力，但是多看看书，说弗定可以让儿子看上去有眼文化，就讲：“好嗰好嗰，箇末就箇只伐。”
小人讲：“好嗰好嗰阿姨，我帮侬去弄啊。”
嘞陌生头噢，电话就响起来了，余彩琴想，哟，儿子介快就打电话来了，结棍也是蛮结棍嗰。
伊跑过去接电话，果然是儿子。
儿子讲：“姆妈，我寻着工作唻！”
余彩琴讲：“好嗰呀，啥工作？”
儿子讲：“外文书店营业员，就嘞拉福州路高头，近来死嗰。”
余彩琴讲：“外文书店啊？箇侬英文箇点点分数，拎得清爽伐？”
儿子讲：“弗要紧嗰呀，四楼弗讲英文嗰，我有办法嗰。”
余彩琴想儿子大了，总算是有眼腔调了。
儿子讲：“好了姆妈我挂脱了，等脱歇还要去单位培训唻，姆妈再会噢。”
余彩琴讲：“哦好嗰好嗰，侬刚刚上班噢，侬骨头帮我收收紧，弗要畀同事看笑话了噢。”
儿子拿电话挂脱了。（注）
余彩琴转过来搭小人讲：“哟！看弗出嘛！侬还是蛮有点本事嗰嘛，我看伊开心得来弗得了。”
小人蛮骄傲嗰：“我是蛮有本事嗰啊，阿姨侬要相信我。还有最后一只愿望，阿姨侬要啥？”
余彩琴讲：“啊？已经最后一只啦？噢，箇我要好好叫想想看嗰。”
小人讲：“弗要紧嗰，阿姨侬慢慢叫想好了，阿拉弗急嗰。”
余彩琴讲：“好，已经想好了。”
小人吓一跳讲：“介快？阿姨侬要许只啥？”
余彩琴讲：“我要世界和平。”
箇小人戆脱了，半日天再讲：“阿姨侬哪能一记头来只介大嗰，我有眼吃弗消嗰呀。”
余彩琴也有点弗好意思，讲：“侬阿是弗来事？弗来事算了，阿姨调一只。”
小人讲：“箇，来事嘛倒也是来事嗰，但是要再花脱眼辰光，我要搭阿拉同事一道弄嗰。”
余彩琴讲：“喔唷，箇侬倒是蛮结棍嗰，好，阿姨等侬。”
小人从袋袋里摸法摸法，摸出一部小手机，嘞拉只微信嗰群里向发了只消息，等脱一歇转过来讲：“好，阿姨我要去了啊，今朝夜到头新闻侬应该就好看到世界和平了，阿姨再会。”
余彩琴讲：“啊？侬箇就要跑啦？”
小人讲：“对嗰呀，因为要本人到场签字，还要身份证原件复印件，蛮烦嗰。”
余彩琴讲：“哦，箇末侬去伐侬去伐。”
小人挥挥手讲：“阿姨再会噢！”
余彩琴嘞陌生头叫了一声：“唉，侬再等一歇！”
小人吓了一跳：“阿姨侬还有啥事体啊？”
余彩琴从袋袋里也摸出一只安卓嗰老年机讲：“来来来，阿拉微信扫一扫，加只好友。”（请注意微信之正确发音，勿再读成威信了）
小人乱笑，讲：“阿姨看弗出嘛，侬还蛮时髦嗰嘛。”
夜到头六点半，余彩琴跟搭老头子吃好夜饭，调到新闻综合频道看夜间新闻。夜间新闻里向箇眼睛大得来吓煞人嗰女主持人嘞拉讲：“今日北京时间下午四点左右，中东、非洲、东欧等多嗰战争地区上空出现一名亚裔中年妇女头像，看到此头像的人纷纷放下了武器，与敌人握手言和。，他们采访到部分看到这一奇观的人员，均声称在看到这位妇女头像的同时，心中响起不明所以但使人宁静平和的语言，消弭了宗教和种族仇恨，使他们的心联为一体，觉得能够靠谈判与讨价还价解决相关问题。”
新闻高头放出来箇头像嗰照片，余彩琴一口茶推扳眼喷出来。
箇是余彩琴嗰微信头像，伊是嘞该鲁迅公园里向让小姊妹拍嗰。
伊拉老头子看看新闻，再看看余彩琴，讲：“唉，老太婆啊。箇张照片阿是搭侬有眼像啊？”
余彩琴讲：“好像是有点像噢，唉，弗晓得哪能桩事体啊？”
老头又看看新闻，讲：“唉，仔细看看好像又弗大像了呶。”
余彩琴嘞陌生头想起来，问老头子：“箇台子上向嗰镜子阿是侬买嗰？”
老头讲：“啊呀，侬弗是讲屋里向嗰绒线针断脱了嘛，我去摊头高上买了一把，老板讲加两块洋钿送畀我嗰镜子，我想蛮好，就买了。”
余彩琴讲：“侬又听信人家推销，畀人家吃牢了呶。”
老头子刚刚想表态，余彩琴又讲：“弗过啊，箇趟嗰镜子买得蛮好嗰。”
（注）如果对上海地理不熟悉嗰话，福州路外文书店四楼是Animate。
（全文完。欢迎在最下方评论，或者赞赏作者与朗读者）
如果您有想说的，可以在本文最下方发表或者查看评论。
如果您喜欢，可以点击最下方的赞赏按钮，赞赏本文的作者和朗读者。
请一起关注吴语传承的问题，关注吴语传承的现状。
传承千年古音，请把吴语传承给下一代。
点击左下方阅读原文，可查看吴语公众号的过往更新。