སྐྱེ་འཆིའི་སྲང་ལ་ཀུན་ཀྱང་གཞལ་བ་ན།།

ཀུན་ཀྱང་འགྲོ་ལམ་ཉག་གཅིག་འཆི་བ་ཡིན།།

ཁ་བསགས་ངོ་ལ་མི་ལྟ་འཆི་བདག་ཡིན།།

       སྤྱིར་གཤིན་ཆོག་ཏུ་ཇོ་དར་པར་བ། སྒྲོན་མེ་འབུལ་བ།གསོན་པོ་ལ་དབང་སྐུར། ཤི་བོ་ལ་ཁྲུས་ཆོག་སོགས་སུ། གཏོར་བཅའ་མཆོད་བཤམས་སྣ་ཚོགས་དང་། འབུད་རྡུང་བཀྲོལ་གསུམ་གྱིས་སྔགས་དང་ཕྱག་རྒྱ་ཏིང་ངེ་འཛིན་ལ་བརྟེན་ནས།ཚེ་ལས་འདས་པ་བདེ་འགྲོ་ལྷ་མིའི་གོ་འཕང་དང་། ངེས་ལེགས་ཐར་བའི་ལམ་སྣར་སོགས་སུ་འདྲེན་ཅི་ཐུབ་ཀྱིས་ཕན་འབྲས་ཡོད་པ་གཞིར་བཞག་གི་ཐོག་ནས།དུས་ཚོད་འདིར་སློང་མོ་བ་བྱུང་ན། རྒྱུན་ལྡན་ལྟར་མ་ཡིན་ཞིང་། སྦྱིན་པ་གང་དྲག་དྲག་རེ་སྦྱིན་གྱི་ཡོད།ཁྱད་པར་དུ་དམའ་རིམ་སྲོག་ཆགས་ནས་མཐོ་རིམ་སྲོག་ཆགས་བར་གྱི་སྲོག་ཆགས་ཐམས་ཅད་སའི་གོ་ལ་གཅིག་ལ་བརྟེན་ཡོད།འོན་ཀྱང་མཐོ་རིམ་སྲོག་ཆགས་སམ་མི་ཡི་རིགས་ཀྱིས་གོ་ལ་ལ་བརྟེན་ནས་མ་རྩ་ལོངས་སུ་སྤྱོད་རྒྱུ་མང་ཆེ།སྲོག་ཆགས་གཞན་དག་གིས་དེ་ཙམ་ལོངས་སུ་སྤྱད་པའི་གོ་སྐབས་མེད། དེར་བརྟེན་གཤིན་ཆོག་སྐབས་ཀྱི་གཏོར་མ་དང་།མར་རྒྱན། མཆོད་འབྲུ་སོགས་ཕྱིར་བཀྲམ་པས། བྱ་དང་བྱེའུ་འབའ་འབུ་ཐམས་ཅད་ཀྱིས་ལོངས་སུ་སྤྱད་པས།དེ་ནི་སྲོག་ཆགས་དེ་དག་ལ་ལོངས་སྤྱད་ཁ་གསབ་བྱེད་པའི་གོ་སྐབས་ཡག་ཤོས་ཤིག་རེད་ལགས། དེང་སང་ནི་ཆོ་ག་ཚོགས་ཐེངས་རེ་ལ་གཏོར་མ་མར་རྒྱན་དང་བཅས་པ་གཞོང་པ་གང་ཙམ་དང་།མཆོད་འབྲུ་ཡང་སྡེར་མ་ཁ་ཤས་ཙམ་རེ་ཡོད་པས། དེ་དག་ཕྱིར་ལ་བཀྲམ་པས། བྱ་བྱེའུ་ཁྱུ་དང་ཁྱུ།ཁྱི་འཁྱར་ཡང་གང་ལ་གང་མཚམས་རེ་ལ་གསོལ་ཚིག་ཕུན་སུམ་ཚོགས་པ་ཞིག་ཡོང་གི་འདུག འདི་ཡང་སྲོག་ཆགས་བར་གྱི་སྙོམས་སྒྲིག་དང་།འདྲ་མཉམ་ཡོང་ཐབས་ཤིག་གཤིན་ཆོག་ལས་གྲུབ་པའི་ཆོས་ཉིད་ཅིག་རེད། ཁྱད་པར་དུ་གཤིན་པོའི་ཤ་ཁྲག་རུས་གསུམ་པོ་ཡང་།བྱ་ལ་སྦྱིན་ན་བྱ་ཡི་བཀྲེས་ལྟོགས་སེལ། ས་ལ་བཞག་ན་འབུ་སྲིན་གྱི་བཀྲེས་ལྟོགས་སེལ། ཆུ་ལ་གཤེགས་ན་ཆུ་གནས་སྲོག་ཆགས་ཀྱི་བཀྲེས་ལྟོགས་སེལ་བ་དང་།མེ་ལ་བསྲེགས་པས་དྲི་ཟའི་འཇིག་རྟེན་གྱི་བཀྲེས་ལྟོགས་སེལ་བ་སོགས། གཤིན་ཆོག་ནི་འཇིག་རྟེན་འདིར་ཆེས་དགོས་མཁོ་ཆེ་བའི་བྱ་འགུལ་ཞིག་ཡིན་ལ།བྱ་འགུལ་འདི་ཆོས་ཉིད་ཀྱིས་གྲུབ་པའི་དགོས་པ་ཡོད་ལ། ཕན་པ་ཡོད་པའི་བྱ་འགུལ་ཞིག་རེད།

སྨྲས་པ།

གཤིན་རྗེའི་ཁྲིམས་དེ་ཡ་མེད་ཐོག་འབབ་རེད།།

སྐྱེ་འཆི་རིས་སུ་བཅད་ན་བསམ་མེད་རེད།།

ལྡོག་མེད་འདི་ནི་དངོས་པོའི་གཤིས་ལུགས་རེད།།

རྒྱུ་མེད་འབྲས་བུ་འདོད་པ་ལོག་པའི་བློ།།